विद्यालयको बार्षिक परीक्षा सकिएसङ्गै बालबालिकाको समग्र विकासलाई लक्षित गर्दै कोलिउड सुपर डान्स एण्ड फिटनेस प्रा.लि.ले हेटौंडामा १५ दिने ‘लिटिल क्याम्प’ आयोजना गर्ने भएको छ । आधुनिक जीवनशैलीका कारण घट्दो सिर्जनात्मक अभ्यास र सामाजिक अन्तरक्रियालाई मध्यनजर गर्दै बालबालिकालाई व्यवहारिक, सिर्जनात्मक तथा आत्मविश्वासी बनाउन क्याम्प सञ्चालन गर्न लागिएको हो ।
क्याम्पमा हस्तकला, चित्रकला, गायन, नृत्य, फेसन प्रस्तुति तथा ट्राफिक नियम सम्बन्धी सचेतना जस्ता गतिविधिहरू समावेश गरिने छन् । साथै खेलकुद, समूहगत अभ्यास र प्रेरणामूलक कार्यक्रममार्फत नेतृत्व क्षमता, अनुशासन र सहकार्यको भावना विकास गराइने आयोजकले जनाएको छ ।
क्याम्प सञ्चालनमा कलिउड सुपर डान्स एण्ड कलाकेन्द्रका सञ्चालक तथा डान्स प्रशिक्षक बिजय स्यान्तान र रुपा स्याङ्तान लगायतको विशेष भूमिका रहनेछ ।
नारायणी मलस्थित तेस्रो तल्लामा सञ्चालन हुने क्याम्प चैत्र २४ गते देखि दैनिक बिहान ११ बजेदेखि साँझ ५ बजेसम्म चल्नेछ । ५ देखि १५ वर्षसम्मका बालबालिकाका लागि उपयुक्त क्याम्पको शुल्क १० हजार रुपैयाँ तोकिएको छ ।
सीमित सिट भएकाले इच्छुक अभिभावकलाई समयमै आफ्ना बालबालिकाको नाम दर्ता गराउन आयोजकले अनुरोध गरेको छ ।
